Macam sumando di minang kabau

Macam sumando

Manuruik urang cadiak pandai

Nan ba Padang Laweh dek aka

Nan balubuak dalam Jo Budi

Adok ka sifaik urang sumando

Ado Ampek parakaro :

1. Sumando kacang miang

Tasabuik sumando kacang miang

 Manyeso di rumah gadang

Mangata ka IPA bisan

Batang tarantang di putuih nyo

Nan kusuik di enjo enjo

Aia taganang di kuncah kuncah

Nan karuah di kundak kundak

Awak sakandang tak sabaun

Jo mintuo tak namuah elok

Ba pambayan bamusuah bathin

Mamak rumah di upek juo

Jauah kan sifaik kacang miang

Sumando cilako tu Mamonto

Tacacek Bana di nagari

2. Sumando langau hijau

Baa Kaka nyo langau hijau

Ka hilia Tabang ka mudiak hinggok

Di siko katinabangan

Di Sinan Talua manateh

Baru tampak saik nan baru

Awak maraok kasubaliak

Itu sumando Rembang mati

Gilo kawin gilo ba bini

Ba jando satiok suduik

Anak baserak bilang kampuang

Usah di pakai sifat nantun

Sifat tacemo dalam kampuang

3. Sumando lapiak buruak

Tasabuik sumando lapiak buruak

Talangkah pasa biaso

Takirai indak mambaa

Masak lunyah Kiliran kaki

Awak tatap di lantai sajo

Gilo mauli anak bini

Nan bak ayam tajarek jangkia

Ibaraik kutu di rumah gadang

Dunsanak indak tasilau

Kamanakan haram ta bimbiang

Urang kampuang di baok lengah

Hiduik bagantuang ka Pusako

Baparam sajo di dalam biliak

Bali rokok mintak ka bini

Anak batambah banyak juo

Usah di tiru nan bak kian

Randah Bana martabat awak

4. Sumando niniak mamak

Ado pun sumando niniak mamak

Ka lawan urang baiyo

Kusuik di baok manyalasai

Karuah di baok manjaniahi

Nan bak lampu di tangah rumah

Cahayonyo sampai ka halaman

Bendang nyo sampai ka subarang

Taranglah koto Jo nagari

Pandai2 jadi sumando

Kok kurang awak manukuak

Kok senteang awak mambilai

Sayangi nan banyak

Paliharo nan bapucuak

Sungguah2 ba tanam Mudo

Lambuak2 tanaman Tio

Suko marambah manaruko

Nan ka buliah anak Wak juo

Nyampang tapakai nan baitu

Tuah lakek puji mandatang

Ajaran agamo ta amakan

Pituah adaik ta pakaikan