Caro Maimbau Panitahan Pertamo

Angku Dt................

Angku St......

1.Caro I

Sungguahpun angku surang

Baduo jo batigo tu lah nan taimbau

Nak sarapek jo papeknyo lah

Baliau nan hadir nan duduak balingkah

Di ateh rumah nangko

Katampek ambo ma muhunkan sambah

Dengan salam

Kurang tasilang ka ta atok

Atok nak urang sialahan

Kurang pambilang jo pa atok

Sambah jo salam di pamuliakan

Dimintak reda dengan maaf

Kahadapan baliau nan basamo

Kasimpanan sambah

Ka pado.................

2. Caro II

Sambah sa ujuik ka panghulu

Sabarek bungkah nan piawai

Naraco luruih main daun

Indak basisiah jo basibak

Bukan ba hinggo jo babateh

Dari ujuang lapeh ka pangka

Dari tapi lalu ka tangah

Dilingkuang sambah ka sadonyo

Gatang panuah cupak balanjuang

Sukatan anak minang kabau

Jo salam sambah di anjuang

Ukua jo jangko kok talampau

Kalilawa di sungai rimbang

Anak ruso mati tadabiah

Kok gawa tolong lah timbang

Kok doso ampun nan labiah

Rasian pamenan lalok

Kacimpuang pamenan mandi

Kurang pambilang jo paatok

Sambah jo salam pamanuahi

Kasimpanan sambah kapado....

3. Caro III

Kasah Ambun Kasah Biludu

Batanti ba jaik tapi

Baturap jo banang sirah

Alah tahampai di sandaran

Pisau sirauik ulu songsang

Saruang nyo tareh kayu jati

Ulu nyo pangka kayu kamaik

Takuik ganta ambo mambilang

Pangulu banyak nan sati

Tuangku banyak nan kiramaik

Rang gadang banyak nan batuah

Mulonyo jalo di serakkan

Kanai kulari nan ba palun

Mulonyo kato disambahkan

Disusun jari mintak ampun

Kajirek tabang ramo2

Inggok mancangkam lidih saga

Tadabuak lalu ka tanah

Ketekindak disanjunag nama

Gadang indak disabuik gala

Sambah tibo di tangah2

Diminta reda dengan maaf

Kahadapan baliau nan basamo

Kasimpanan sambah......

4. Caro IV

Walaupun surang baduo batigo nan taimbau

Tabilangkan gala talembakkan tuah

Ta angkek kan tangan ta susun kan jari

Akan tatapi

nan manjadi naiaik di hati cinto di bathin

iyolah kapado angku angku

nan saririk duduak  di tapi

sabanja barih di  katangah

indak basisih jo basibak

bukan bahinggo jo babateh

dilingkuang sambah kasamonyo

dimintak rela dengan maaf

kahadapan baliau nan basamo

kasimpanan sambah.....

5. Caro V

Walaupun ka angku lipahan sambah

Curahan salam

Akan tatapi wujud di bathin

Iyolah ka bakeh niniak jo mamak

Langkok sarato imam katik

Bundo kanduang samo didalam

Indak tasabuik namo ciek ciek

Kok indak tabilang gala surang surang

Kaganti pa atok pambilang gala

Karilaan sajo pamanuahi

dimintak rela dengan maaf

kahadapan baliau nan basamo

kasimpanan sambah.....

6. Caro VI

Sakali ambo maimbau

Sapatah rundiang nan lalu

Walaupun angku surang nan taimbau

Wujuik pangana ka nan rapek

Sambah talembak ka nan banyak

Sambah ta wujuik, sambah tasimpuah

Sabarek bungka nan paiawai

Naraco luruih main daun

Indak basisiah jo basibak

Bukan bahinggo jo babateh

Iyolah majilih niniak mamak

Ibu bapo karik jo baik

Urang nan tau cadiah pandai

Nan mudo arih budiman

Langkok sarato bundo kanduang

Samo didalam panggilan ambo

dimintak rela dengan maaf

kahadapan baliau nan basamo

kasimpanan sambah.....

7. Caro VII

Mangko nyo angku denai imbau

Ajaran cupak nan piawai

Adaik limbago di minang kabau

Barundiang tantu jo nan pandai

Angku nan gadang tampak jauah

Rang gadang jarang tasuo

Tampek bagantuang lai taguah

Sambah ka angku ta timponyo

dimintak rela dengan maaf

kahadapan baliau nan basamo

kasimpanan sambah.....

8. Caro VIII

Sambah jo salam ambo

Kapado angku angku niniak mamak

Nan gadang basa batuah

Angku angku alim ulama

Suluah nan indak kunjuang padam

Angku angku cadiak jo pandai

Pasak jo kungkuang di nagari

Nak salangkok ganok nyo lah

Dubalang jo rang palimo

Parik dalam pagaran kokoh

Bundo kanduang samo  didalam

Kararanggo di batang kapeh

Manitih batang silasiah

Lalai ka pucuak silaronyo

Bukan bahinggo jo babateh

Indak bababak jo basisiah

Dilingkuang sambah ka samonyo

dimintak rela dengan maaf

kahadapan baliau nan basamo

kasimpanan sambah.....