Pasambahan Minang

PIDATO

Oleh:

HAYATULLAH.K KARI MUDO

(Caro Maimbau)

Angku Dt.................

Sambah jo salamdi puhun kan karibaan angku

sakali gawa Baribu kali maaf

Angku St...........

Sambah dipuhunkan karibaan angku

Sakali gawa baribu kali maaf

Sungguahpun Angku surang jo baduo

Itulah nan taimbau diambo

Nak sarapek jo ganoknyolah

Sarato baliau nan hadir

Nan duduak balingka di

Ateh rumah nangko

Ka tampek ambo mamuhunkan

Sambah dengan salam

Kurang tabilang kataatok

Atok nak urang sialahan

Kurang pambilang jo paatok

Sambah jo salam di pamuliakan

Kasimpunan sambah kapado.........

1.     PASAMBAHAN MAKAN

Apolah Jinihnyo sambah nan kadilalukan

Titah nan kadipuhunkan ka bakeh angku

Harum Baunnyo bungo malua

Kuniang ruponyo bungo kambang

Barueh bakatak-katak

Pamenan rajo di ulakan

Cucu tuangku bangkahulu

Cangkia lusin buatan padang

Pinggan baukia jo aia ameh

Dawat bacampua jo suaso

Hidangan mulia nan tahidang

Cawan jo mangkuak nan taratur

Sadang nyo suko manikmati

Gabak dihulu tando kapaneh

Cewang dilangik tando kahujan

Kilek camin lah kamuko

Kilek baliuang lah kakaki

Apolah kalaluannyo

Lah hasia janang manatiang

Nasi talatak mintak dimakan

Aia talatak mintak diminum

Nak mintak di parenai

Sagalo baliau nan hadir

Kok kandak mintak balaku

Pintak mintak babari

Sakian pasambahan bakeh angku st....

Jawab

Sambah manyambah angu juolah

Nan di anjuang tinggi

Diambak naknyo gadang

 Diateh angin nan basa

dibawah hujan nan pahun

kato nan bapangka

apo pulolah nan manjadi

pangka kato diangku tadi

Harum Baunnyo bungo malua

Kuniang ruponyo bungo kambang

Barueh bakatak-katak

Pamenan rajo di ulakan

Cucu tuangku bangkahulu

Cangkia lusin buatan padang

Pinggan baukia jo aia ameh

Dawat bacampua jo suaso

Hidangan mulia nan tahidang

Cawan jo mangkuak nan taratur

Sadang nyo suko manikmati

Gabak dihulu tando kapaneh

Cewang dilangik tando kahujan

Kilek camin lah kamuko

Kilek baliuang lah kakaki

Apolah kalaluannyo

Lah hasia janang manatiang

Nasi talatak mintak dimakan

Aia talatak mintak diminum

Nak mintak di parenai

Sagalo baliau nan hadir

Kok kandak mintak balaku

Pintak mintak babari

Kan itu na manjadi bana diangku cako?

Sapanjang bana nan katangah

Diangku cako

Lah jalan pasa nan batampuah

Kato bana nan basabuik

Didanga lah baik bunyi

Dipandang lah rancak rupo

 Baa tunyo lai kini

Karano baliau lai rapek

Jo ganok duduak balingka

Di ateh rumah nangko

Ambo sentak kato jo munfakaik

Ditariak kato jo paiyoan

Mananti  angku sakutiko

Lai kadalam bana diangku st.....?

Jawab

Kato sapatah jo duo diambo

Diangku lai kabarantang panjang

Kaba kambang leba

Mancari picak nak satapiak

 Mancari bulek nak sagolong

Manuruik pituah angku juo

Bulek aia di pambuluah

Bulek kato jo munfakaiak

Limbagonyo di paenggongkan

Lah kabapaenggopngkan pulo

Diangku antaro jo baliau

Nan basamo

Sarancaknyo ngku

Tapakai diambo sifat mananti

Jawab

Mintak rela jo maaf parantian

Pasambahan

(mambaliakkan pasambahan)

Angku St.............

Talambek angku mananti

Talalai ambo mambari

Sarago ambo maiyo manpatidokan

Antaro jo baliau nan basamo

Apolah buah jo bari baliau nan basamo

Dek janjang lah ditingkek

Dek bandua lah ditapiak

Hamparan alah dikaduduaki

Kok indak bana minum jo makan

Kok sangan iko sajo baa nyo ngku?

Jawab

Dek janjang lah ditingkek

Dek bandua lah ditapiak

Hamparan alah bakaduduaki

Kan itu nan manjadi bana di

Angku cako?

Jawab

Sabananyo ngku

Jawab

Sapanjang bana nan katangah diangku cako

Didanga lah baik bunyi

Dipandang lai rancak rupo

Baa tunyolai kini

Utang ameh nak balayia

Utang kaua nak kajudah

Utang ameh nak babayia

Utang kaua nak basudah

Baa tunyolai kini

Sagalo juadah nan katangah iyo

Batarimo suko juo ngku

jawab

basikareh hati

basikareh muluik bana wak

bana sinan juo katibonyo

baa tunyo lai kini

karimbo pilinan aka

kalabuah pilinan kawek

bamulo angku sipangka

manuruik kami nan alek

Jawab

Asalai kandak kabalaku

Asalai pintak kababari

Samo bamulai sajo wang ngku

Parantian pasambahan

2.     PASAMBAHAN PULANG

Apo pulolah pasambahan nan

Ka mabo lalukan bakeh angku

Baserong banta rang batawi

Baikek cincin rang pitalah

Bacincin baampu karang

Nak urang sungai balantiak

Nak lalu katalang batagak

Singgah ka balai rang bapiriang

Daun diirun nan lah cabiah

Pinggan di susun nan lah rarak

Sirarak bungo silampayo

Kambang lah bungo tigo tangkai

Alam bagarak hidangan bacayo

Mukasuik sipangka nan lah sampai

Apolah nan manyampaikan

Iyo doa jo alfatihah

Baa tunyo lai kini

Pihak dek kami sado nan datang

Duduak lamo raso kapanek

Tagak lamo raso kapaniang

Mintak dilapeh jo hati nan suci

Jo muko nan janiah

Manuju tampaik masiang2

Sakian sambah pado angku

Jawab

Sambah manyambah angu juolah

Nan di anjuang tinggi

Diambak naknyo gadang

 Diateh angin nan basa

dibawah hujan nan pahun

kato nan bapangka

apo pulolah nan manjadi

pangka kato diangku tadi

Baserong banta rang batawi

Baikek cincin rang pitalah

Bacincin baampu karang

Nak urang sungai balantiak

Nak lalu katalang batagak

Singgah ka balai rang bapiriang

Daun diirun nan lah cabiah

Pinggan di susun nan lah rarak

Sirarak bungo silampayo

Kambang lah bungo tigo tangkai

Alam bagarak hidangan bacayo

Mukasuik sipangka nan lah sampai

Apolah nan manyampaikan

Iyo doa jo alfatihah

Baa tunyo lai kini

Pihak dek angku sado nan datang

Duduak lamo raso kapanek

Tagak lamo raso kapaniang

Mintak dilapeh jo hati nan suci

Jo muko nan janiah

Manuju tampaik masiang2

Kan itu nan manjadi bana angku cako?

Ndak tunyo lai kini

Sapanjang bana nan katangah

Diangku cako

Kato bana nan basabuik

Jalan pasa nan batampuah

baa tunyolai kini

dek karano baliau lai

rapek jo ganok duduak

balingka di atek rumah nangko

ambo sentak kato jo munfakaiak

ditariak kato jo paiyoan

mancari picak satapiak

bulek nak sagilong

lai kadalam bana

jawab

Kato sapatah jo duo diambo

Diangku lai kabarantang panjang

Kaba kambang leba

Mancari picak nak satapiak

 Mancari bulek nak sagolong

Manuruik pituah angku juo

Bulek aia di pambuluah

Bulek kato jo munfakaiak

Limbagonyo di paenggongkan

Lah kabapaenggopngkan pulo

Diangku antaro jo baliau

Nan basamo

Sarancaknyo ngku

Tapakai diambo sifat mananti

Jawab

Mintak rela jo maaf parantian

Pasambahan

(mambaliakkan pasambahan)

Angku St.............

Talambek angku mananti

Talalai ambo mambari

Sarago ambo maiyo manpatidokan

Antaro jo baliau nan basamo

Apolah buah jo bari baliau nan basamo

Kandak lai raso kabalaku

Pintak raso kababari

Tapi samantang pun baitu

Tantangan juadah nan katangah

Kok kurang susunnyo nan baksiriah

Kok kurang ririknyo nan bak pinang

Baitupun juo duduak

Kok ado diateh takabawahkan

Nan dibawah takatehkan

Taparampiangan ipa dengan bisan

Rila jo maaf di pabanyak

Jawab

Kandak lai raso kabalaku

Pintak raso kababari

Tapi samantang pun baitu

Tantangan juadah nan katangah

Kok kurang susunnyo nan baksiriah

Kok kurang ririknyo nan bak pinang

Baitupun juo duduak

Kok ado diateh takabawahkan

Nan dibawah takatehkan

Taparampiangan ipa dengan bisan

Rila jo maaf di pabanyak

Kan itu nan manjadi bana

Diangku cako?

Sapanjang bana nan katangah diangku cako

Didanga lah baiak bunyi

Dipandang lah ranbcak rupo

Baa tunyo lai kini

Sabalun janjang di tingkek

Sabalun bandua di tapiak

Lah labiah dahulu bamaafkan

Lah kasanang hati angku

Jawab

Sapanjang bana nan katangah diangku cako

Didanga lah baiak bunyi

Dipandang lah ranbcak rupo

Baa tunyo lai kini

balapeh angku jo hati suci

jo muko janiah

kami nan tingga baa lo ngku?

Jawab

Asalai kandak kabalaku

Asalai pintak kababari

Lah balapeh kami jo hati nan

Suci jo muko nan janiah

Angku nan tingga

Batinggakan pulu jo hati

Suci jo mako janiah

Alah kasanang hati angku.

3.     PASAMBAHAN PULANG TAKLIA

Apo pulolah pasambahan nan

Ka mabo lalukan bakeh angku

Sakik surang damam barampek

Sapuluah nan maarangkan

Kok sakik lah dicarikan ubek

Kok damam lah dicarikan tawa

Ubek nan indak manyanangkan

Tawa nan indak mandinginkan

Indak dapek silandak padi

Landak bilah nan babuku

Indak dapek bakandak hati

Kandak allah nan balaku

Ma kandak allah nan balaku

Lah bapulang karahmatullah

.......................................

Bararak manuju jalan

Babondong manuju tampek

Ditingkek janjang dibawah

Ditapiak bandua diatek

Manampakkan hati nan suci muko nan janiah

Pado silang nan bapangka

Karajo nan bapokok

Dek duduak manganduang niaik

Tagak maninjau arah

Lah taniak tanasa pulo di kami

Mambacokan doa, tahlil

Sarato alfatihah

Nan kikto hadiahkan

Kapado almarhum

Diateh rumah nangko

Mudah mudahan baliau tu

Dikubua dapek kalapangan

Diakhirat dapek nauangan

Manjadi ibadat bagi kito nan mambacokan

Baa tunyo lai kini

Pihak dek kami sado nan datang

Duduak lamo raso kapanek

Tagak lamo raso kapaniang

Mintak dilapeh jo hati nan suci

Jo muko nan janiah

Manuju tampaik masiang2

Sakian sambah pado angku

Jawab

Sambah manyambah angu juolah

Nan di anjuang tinggi

Diambak naknyo gadang

 Diateh angin nan basa

dibawah hujan nan pahun

kato nan bapangka

apo pulolah nan manjadi

pangka kato diangku tadi

Sakik surang damam barampek

Sapuluah nan maarangkan

Kok sakik lah dicarikan ubek

Kok damam lah dicarikan tawa

Ubek nan indak manyanangkan

Tawa nan indak mandinginkan

Indak dapek silandak padi

Landak bilah nan babuku

Indak dapek bakandak hati

Kandak allah nan balaku

Ma kandak allah nan balaku

Lah bapulang karahmatullah

.......................................

Bararak manuju jalan

Babondong manuju tampek

Ditingkek janjang dibawah

Ditapiak bandua diatek

Manampakkan hati nan suci muko nan janiah

Pado silang nan bapangka

Karajo nan bapokok

Dek duduak manganduang niaik

Tagak maninjau arah

Lah taniak tanasa pulo di kami

Mambacokan doa, tahlil

Sarato alfatihah

Nan kikto hadiahkan

Kapado almarhum

Diateh rumah nangko

Mudah mudahan baliau tu

Dikubua dapek kalapangan

Diakhirat dapek nauangan

Manjadi ibadat bagi kito nan mambacokan

Baa tunyo lai kini

Pihak dek angku sado nan datang

Duduak lamo raso kapanek

Tagak lamo raso kapaniang

Mintak dilapeh jo hati nan suci

Jo muko nan janiah

Manuju tampaik masiang2

Kan itu nan manjadi bana angku cako?

Ndak tunyo lai kini

Sapanjang bana nan katangah

Diangku cako

Kato bana nan basabuik

Jalan pasa nan batampuah

baa tunyolai kini

dek karano baliau lai

rapek jo ganok duduak

balingka di atek rumah nangko

ambo sentak kato jo munfakaiak

ditariak kato jo paiyoan

mancari picak satapiak

bulek nak sagilong

lai kadalam bana

jawab

Kato sapatah jo duo diambo

Diangku lai kabarantang panjang

Kaba kambang leba

Mancari picak nak satapiak

 Mancari bulek nak sagolong

Manuruik pituah angku juo

Bulek aia di pambuluah

Bulek kato jo munfakaiak

Limbagonyo di paenggongkan

Lah kabapaenggopngkan pulo

Diangku antaro jo baliau

Nan basamo

Sarancaknyo ngku

Tapakai diambo sifat mananti

Jawab

Mintak rela jo maaf parantian

Pasambahan

(mambaliakkan pasambahan)

Angku St.............

Talambek angku mananti

Talai ambo mambari

Sarago ambo maiyo manpatidokan

Antaro jo baliau nan basamo

Apolah buah jo bari baliau nan basamo

Kandak lai raso kabalaku

Pintak raso kababari

Tapi samantang pun baitu

Dek tahlil ko lah di mulai

Malam partamo

Untuak kaduo jo katigo

Barami-rami juo wak ngku

Jawab

Kandak lai raso kabalaku

Pintak raso kababari

Tapi samantang pun baitu

Dek tahlil ko lah di mulai

Malam partamo

Untuak kaduo jo katigo

Barami-rami juo wak ngku

Kan itu nan manjadi bana

Diangku cako?

Sapanjang bana nan katangah diangku cako

Didanga lah baiak bunyi

Dipandang lah ranbcak rupo

Baa tunyo lai kini

Indak bana di pailia dipamudiakkan

Bisiak tu lah samo kadangaran

Imbautu lah samo kalampauan

Asalai hari taduah sajo

Jo insyaallah jawabnyo ngku

Lah kasanang hati angku

Jawab

Sapanjang bana nan katangah diangku cako

Didanga lah baiak bunyi

Dipandang lah ranbcak rupo

Baa tunyo lai kini

balapeh angku jo hati suci

jo muko janiah

kami nan tingga baa lo ngku?

Jawab

Asalai kandak kabalaku

Asalai pintak kababari

Lah balapeh kami jo hati nan

Suci jo muko nan janiah

Angku nan tingga

Batinggakan pulu jo hati

Suci jo mako janiah

Alah kasanang hati angku.