PASAMBAHAN KECAMATAN MATUR

1.     

  KARI MUDO JO DT. MARUHUN LABIAH (Mintak Sifaik/ mamancang galanggang)

KARI MUDO	:	Angku DT. MARUHUN LABIAH
DT. MARUHUN LABIAH	:	Sampaikan lah angku....
KARI MUDO	:	Sakali gawa baribu kali ampun
		Sambah sa ujuik ka panghulu Sabarek bungkah nan piawai Naraco luruih main daun Indak basisiah jo basibak Bukan ba hinggo jo babateh Dari ujuang lapeh ka pangka Dari tapi lalu ka tangah Dilingkuang sambah ka sadonyo Gatang panuah cupak balanjuang Sukatan anak minang kabau Jo salam sambah di anjuang Ukua jo jangko kok talampau Kalilawa di sungai rimbang Anak ruso mati tadabiah Kok gawa tolong lah timbang Kok doso ampun nan labiah Rasian pamenan lalok Kacimpuang pamenan mandi Kurang pambilang jo paatok Sambah jo salam pamanuahi Kasimpanan sambah kapado ANGKU DT. MARUHUN LABIAH Bukan nyo ambo ka sambah manyambah antaro jo angku , malainkan ka pai tampek batanyo , ka pulang tampek babarito Rumah gadang tampek malam , nan tuo tampek batanyo, samo gadang lawan baiyo, niniak mamak tampek mintak sipaik. Sipaik apo pulo lah nan ka bajapuik karibaan angku... Kok ado kiro2 nan bakandak, paratian nak maniliah, niat jo nasa dari rumah, alah kok buliah bana di katangahkan?
DT. MARUHUN LABIAH	:	Sambah manyambah angku juolah nan di anjuang tinggi, diambak gadang , diateh angin nan barasa , dibawah hujan nan bapuhun, di siko kato nan ba pangka, Apolah nan manjadi pangka di angku tadi Kok ado kiro2 nan bakandak, paratian nak maniliah, niat jo nasa dari rumah, alah kok buliah bana di katangahkan? Kan iko nan jadi bana dek angku?
KARI MUDO	:	Sabananyo angku
DT. MARUHUN LABIAH	:	Asalai lazim di adat, kawi di sarak, dilingkuang kato nan duo, indak manyalah kato udang, insya Allah buliah di katangahkan ngku....
KARI MUDO	:	Insya Allah nan ambo ka tangahkan, lai lazim dek adat, kawi dek sarak, dilingkuang kato nan duo..  indak manyalah kato undang,iko bana nan ambo katangahkan ngku... Tapi sabuah juo bana bajauik ka ribaan angku, dek manusia basifaik kilaf , tuhan nan basifaik kadim, koktumbuah kilaf jo kilafat, sasek nan indak tasangajo, lupo manaruah katinggalan, ko sifaik juo bajapuik kapado angku
DT. MARUHUN LABIAH	:	Kok itu pulo nan manjadi ulaknyo dek angku , dek manusia basifaik kilaf , tuhan nan basifaik kadim, koktumbuah kilaf jo kilafat, sasek nan indak tasangajo, lupo manaruah katinggalan, ko sifaik juo bajapuik kapado ambo, kan iko nan manjadi bana dek angku?
KARI MUDO	:	Sabananyo angku
DT. MARUHUN LABIAH	:	Sapanjang bana nan katangh dek angku, di danga lah baiak banyi, dipandang lah rancak rupo, baa nyo tu lai kini Dek baliau lai rapek jo ganok duduak balingka di ateh rumah nangko,ado ba niniak dengan mamak, sarato baliau nan tuo- tuo. Raso rasonyo kok luluih basalam, kok hanyuik ba pinteh, kok di tapi bakatangahkan, tibo di tangah, dipaliaro dek baliak basamo,
		Katangahkan lah
KARI MUDO	:	Angku DT. MARUHUN LABIAH, lah basingan dek angku nan bak hari, lah batarangkan pulo nan bak bulan, lah sanang rasonyo dalam hati, sajuak dalam paratian, ambo katangahkan lai angku...
DT. MARUHUN LABIAH	:	Manjadi....

2.       KARI MUDO JO RAJO SIKUMBANG (pasambahan ka makan dari sipangka ka sialek)

KARI MUDO	:	Angku DT. MARUHUN LABIAH
DT. MARUHUN LABIAH	:	Manitahlah
KARI MUDO	:	Sambah jo salam dipuhunkan karibaan angku, sakali gawa baribu kali ampun
KARI MUDO	:	Angku RAJO SIKUMBANG
RAJO SIKUMBANG	:	Sampaikan lah angku
KARI MUDO	:	Sambah tibo di angku Mulonyo jalo di serakkan Kanai kulari nan ba palun Mulonyo kato disambahkan Disusun jari mintak ampun Kajirek tabang ramo2 Inggok mancangkam lidih saga Tadabuak lalu ka tanah Ketek indak disanjuang namo Gadang indak disabuik gala Sambah tibo di tangah2 Kurang tasilang ka taatok Atok nak urang sialahan Kurang pambilang jo paatok Sambah jo salam di pamuliakan Diminta reda dengan maaf Kahadapan baliau nan basamo Kasimpanan sambah kapado angku RAJO SIKUMBANG
RAJO SIKUMBANG	:	Sampaikan lah Angku
	:	Banamo sambah dilalukan Ataupun titah dilekokan Harum baunyo bungo palo Kuniang ruponyo kambang Barueh bakatak karah Pamenan rajo di ulakan Cucu tuangku bangkahulu Jauh disaru nan lah tibo Dakek dipanggia nan lah datang Duduak basamo tangah rumah Kandak sipangka maadokan Baitu kato nan daulu Cakia lusin buatan padang Dibaok urang ka singapur Pinggan baukia ayia ambun Ambun banamo ambun pagi Dawat bacampua asuaso Hidangan mulia lah tahidang Cawan jo mangkuak lah taratur Makan minuman lah tasusun Sadangnyo suko nikmaik hati Raso lah cukuik samparono Cewang di langik tando ka paneh Gabak di ulu tando ka ujan Kilek camin lah kamuko Kilek baliung lah ka kaki Adok juadah nan lah kateh Kok kurang tasusun ta atokkan Indak talatak di tampeknyo Maaf dimintak dari hati Jokok basiang di nan tumbuah Jokok manimbang di nan ado Tumbuah sarupo iko kini Layang layang di ateh batu Kalodan di lao kudo Sumbayang di agiah ba ukatu Makan di bari bakutiko Kini lah tibo kutiko makan Tinggi batangnyo kayu jati Dek angin dahanyo sakah Jatuah kabawah patah tigo Diambiak urang untuak kapaga Kapaga parak sadionyo Minum lah aia nan taisi Santok juadah nan katangah Sampai batambuah lah handaknyo Baitu kandak dipangka Kapado sidang nan hadirko Kandak mintak balaku Kok pintak mintak babari
RAJO SIKUMBANG	:	Tasirok darah didado, tapacak paluah di kaniang Nan angku tibokan ka bakeh ambo, apo sabab mangko baitu Dek kaji lah lamo dek baulang, kok jalan lah lamo ndak batampuah, iyo juo bak papatah angku Tambilang di baliak lansek Tasisik di ambai- ambai Ambo bilang sado nan dapek Nan tingga untuak nan pandai Tapi samantangpun baitu Dek karano baliau lai rapek jo ganok nan duduak balingka di ateh rumah nangko Ambo sentak kato jo munfakauik, di tariak kato jo baiyo, mancari izin di nan tuo, munfakaik nan barampia. Lai tapakai di angku sipaik mananti ?
KARI MUDO	:	Angku RAJO SIKUMBANG
RAJO SIKUMBANG	:	Sampaikan lah ngku..
KARI MUDO	:	Sapanjang bana nan katangah di angku, jikok ditareh di salisiak, jokok diindang di paberai, Dicaliak ka ujuik paham lah nyato titian budi, tarang di batin ka arifan. Ambua saambua kato tibo, langkah salangkah kato sampai, Allah ta’ala pangantuangan, dek sulik bamain budi nan rusuah kilaf kok datang, senjang babaliak kanan bana. Nakjan basuo nan bak kian , elok dituruik barih adaik, papatah adaik nan kawi, undang-undang sabuah hukum, pangulu saundang- undang, ulama samo sakitab. Nak nyo satali sajinjiangan, nak nyo saikek sabarubuang, saukua mangko manjadi, takanak mangko sasuai, mako disentak juolah kato jo munfakaik, mancariizin di nantuo, mancari munfakaik nan barampia, nan  bak pituah angku juo Gadang lah aia dibulakan Tigo pincuran tampek mandi Di angku kato bawalakkan Dek ambo tapakai sipaik mananti
RAJO SIKUMBANG	:	Parantian samantaro angku..
KARI MUDO	:	Manjadi angku...

3.       RAJO SIKUMBANG JO ST. ANJUANG (Baiyo samo sialek)

RAJO SIKUMBANG	:	ANGKU DT. MARUHUN LABIAH
DT. MARUHUN LABIAH	:	Sampaikan lah angku
RAJO SIKUMBANG		Sambah jo salam dipuhunkan karibaan angku, sakali gawa baribu kali ampun
RAJO SIKUMBANG	:	Angku ST ANJUANG
ST. ANJUANG	:	Sampaikan lah Angku
RAJO SIKUMBANG	:	Sambah Tibo di Angku
		Sungguahpun angku surang Baduo jo batigo tu lah nan taimbau Nak sarapek jo papeknyo lah Baliau nan hadir nan duduak balingkah Di ateh rumah nangko Katampek ambo ma muhunkan sambah Dengan salam Kurang tasilang ka ta atok Atok nak urang sialahan Kurang pambilang jo pa atok Sambah jo salam di pamuliakan Dimintak reda dengan maaf Kahadapan baliau nan basamo Kasimpanan sambah Ka pado ANGKU ST. ANJUANG
ST. ANJUANG	:	Sampaikan lah angku
RAJO SIKUMBANG	:	Apolah sambah nan kadi lalukan , titah nan kadipuhunkan Di ateh puntiang nan maantak, mauhuak pasambahan angku kari mudo, nan tatabua ka tangah rapek taserak ka nan rami, tapek tibonyo iyolahka bakeh ambo, Baa ruponyo dek ambo kok kato alun bajawab, pasambahan alun bakumbalikan, angku pambarian.
ST. ANJUANG	:	Sambah manyambah angku juolah nan di anjuang tinggi, diambak gadang , diateh angin nan barasa , dibawah hujan nan bapuhun, di siko kato nan ba pangka, Apolah nan manjadi pangka di angku tadi Di ateh puntiang nan maantak, mauhuak pasambahan angku kari mudo, nan tatabua ka tangah rapek taserak ka nan rami, tapek tibonyo iyolahka bakeh angku, Baa ruponyo dek angku kok kato alun bajawab, pasambahan alun bakumbalikan, ambo ba pambarian,kan ikonan jadi bana dek angku?
RAJO SIKUMBANG	:	Sabananyo angku
ST. ANJUANG	:	Sapanjang bana nan katangah dek angku, di danga lah baiak banuyi, dipandang lah rancak rupo, tapi samantang pun baitu, Dek karano baliau lai rapek jo ganok nan duduak balingka di ateh rumah nangko Ambo sentak kato jo munfakauik, di tariak kato jo baiyo, mancari izin di nan tuo, munfakaik nan barampia. Lai tapakai di angku sipaik mananti ?
RAJO SIKUMBANG	:	Kato sapatah jo duo nan datang dari ambo, ruponyo dek angku , lai ka barantang panjang, bakambang leba , mancari picak nak salayang, bulek nak sagolong, antaro baliau nan basamo, sarancaknyo angku , tapakai dek ambo sipaik mananti.
ST. ANJUANG	:	Parantian pasambahan
RAJO SIKUMBANG	:	Samo- samo

4.       ST. ANJUANG JO DT. MARUHUN LABIAH (Mintak Sifaik /Baiyo jo niniak mamak)

ST. ANJUANG	:	ANGKU DT. MARUHUN LABIAH
DT. MARUHUN LABIAH	:	Sampaikan lah angku
ST. ANJUANG	:	Sambah jo salam dipuhunkan karibaan angku, sakali gawa baribu kali ampun
		Sungguahpun angku surang Baduo jo batigo tu lah nan taimbau Nak sarapek jo papeknyo lah Baliau nan hadir nan duduak balingkah Di ateh rumah nangko Katampek ambo ma muhunkan sambah Dengan salam Kurang tasilang ka ta atok Atok nak urang sialahan Kurang pambilang jo pa atok Sambah jo salam di pamuliakan Dimintak reda dengan maaf Kahadapan baliau nan basamo Kasimpanan sambah Ka pado ANGU DT. MARUHUN LABIAH
DT. MARUHUN LABIAH	:	Sampaikanlah angku
ST. ANJUANG	:	Bukan to ambo sambah manyambah antaro jo angku, malainkan ka pai tampek batanyo, ka pulang tampek babarito. Di ateh puntiang nan maantak, mauhuak pasambahan angku Rajo Sikumbang, nan tatabua ka tangah rapek taserak ka nan rami, tapek tibonyo iyolahka bakeh ambo, Baa ruponyo dek ambo kok kato alun bajawab, pasambahan alun bakumbalikan, sipaik kajawab nan ambo japuik karibaan angku.
DT. MARUHUN LABIAH	:	Sambah manyambah angku juolah nan di anjuang tinggi, diambak gadang , diateh angin nan barasa , dibawah hujan nan bapuhun, di siko kato nan ba pangka, Apolah nan manjadi pangka di angku tadi Di ateh puntiang nan maantak, mauhuak pasambahan angku Rajo Sikumbang, nan tatabua ka tangah rapek taserak ka nan rami, tapek tibonyo iyolahka bakeh angku, Baa ruponyo dek angku kok kato alun bajawab, pasambahan alun bakumbalikan, sipaik kajawab nan angku japuik karibaan ambo. Kan itu nan jadi bana dek angku ?
ST.ANJUANG	:	Sabananyo angku
DT. MARUHUN LABIAH	:	Di ateh puntiang nan maantak, dibawah ujuang nan manikam, dek angku juo lah nan batimbang jawab jo angku RAJO SIKUMBANG, kumbalikan juo lah dek angku, baa pambarian angku tulah sabari jo baliau nan basamo.
ST. ANJUANG	:	Dek angku Juolah nan ka mangumbalikan panitahan rajo sikumbang, sabuah juo bana bajapuik karibaan angku dek manusia basifaik kilaf , tuhan nan basifaik kadim, kok tumbuah kilaf jo kilafat, sasek nan indak tasangajo, lupo manaruah katinggalan, ko sifaik juo bajapuik kapado angku
DT. MARUHUN LABIAH	:	Kok itu pulo nan manjadi ulaknyo dek angku , dek manusia basifaik kilaf , tuhan nan basifaik kadim, koktumbuah kilaf jo kilafat, sasek nan indak tasangajo, lupo manaruah katinggalan, ko sifaik juo bajapuik kapado ambo, kan iko nan manjadi bana dek angku?
ST. ANJUANG	:	Sabananyo angku
DT. MARUHUN LABIAH	:	Sapanjang bana nan katangh dek angku, di danga lah baiak banyi, dipandang lah rancak rupo, baa nyo tu lai kini. Dek baliau lai rapek jo ganok duduak balingka di ateh rumah nangko,ado ba niniak dengan mamak, sarato baliau nan tuo- tuo. Raso rasonyo kok luluih basalam, kok hanyuik ba pinteh, kok di tapi bakatangahkan, tibo di tangah, dipaliaro dek baliak basamo, kumbalikan lah angku
ST. ANJUANG	:	Angku DT. MARUHUN LABIAH, lah basingan dek angku nan bak hari, lah batarangkan pulo nan bak bulan, lah sanang rasonyo dalam hati, sajuak dalam paratian, Kok tibo di pucuak lah manjulai, tibo di ayia lah tabik Ambo baliakkan ka nan tabik angku
DT. MARUHUN LABIAH	:	Manjadi....
ST. ANJUANG	:	Parantian pasambahan

5.       ST. ANJUANG JO RAJO SIKUMBANG (mangumbalikan Panitahan kapado sialek)

ST. ANJUANG	:	Lah talambek angku mananti, sarago ambo baiyo jo batido antaro jo baliau nan basamo, lah dapekizin dek nan tuo, munfakaik jo nan barampia, apo lah buah jo bari dek balaiau nan barampia Di ateh puntiang nan maantak, dibawah ujuang nan manikam, dek angku juo lah nan batimbang jawab jo angku KARI MUDO, kumbalikan juo lah dek angku, baa pambarian angku tulah sabari jo baliau nan basamo.
RAJO SIKUMBANG	:	Dek angku Juolah nan ka mangumbalikan panitahan Kari Mudo, sabuah juo bana bajapuik karibaan angku dek manusia basifaik kilaf , tuhan nan basifaik kadim, kok tumbuah kilaf jo kilafat, sasek nan indak tasangajo, lupo manaruah katinggalan, ko sifaik juo bajapuik kapado angku
ST. ANJUANG	:	Kok itu pulo nan manjadi ulaknyo dek angku , dek manusia basifaik kilaf , tuhan nan basifaik kadim, koktumbuah kilaf jo kilafat, sasek nan indak tasangajo, lupo manaruah katinggalan, ko sifaik juo bajapuik kapado ambo, kan iko nan manjadi bana dek angku?
RAJO SIKUMBANG	:	Sabananyo angku
ST. ANJUANG	:	Sapanjang bana nan katangh dek angku, di danga lah baiak banyi, dipandang lah rancak rupo, baa nyo tu lai kini. Dek baliau lai rapek jo ganok duduak balingka di ateh rumah nangko,ado ba niniak dengan mamak, sarato baliau nan tuo- tuo. Raso rasonyo kok luluih basalam, kok hanyuik ba pinteh, kok di tapi bakatangahkan, tibo di tangah, dipaliaro dek baliak basamo, kumbalikan lah angku
RAJO SIKUMBANG	:	Angku ST. ANJUANG, lah basingan dek angku nan bak hari, lah batarangkan pulo nan bak bulan, lah sanang rasonyo dalam hati, sajuak dalam paratian, Kok tibo di pucuak lah manjulai, tibo di ayia lah tabik Ambo baliakkan ka nan tabik angku
ST. ANJUANG	:	Manjadi....
RAJO SIKUMBANG	:	Parantian pasambahan

6.       RAJO SIKUMBANG JO KARI MUDO (Mangumbalikan /manjawab panitahan dari sipangka)

RAJO SIKUMBANG	:	Angku  Kari Mudo
KARI MUDO	:	Sampaikan lah angku
RAJO SIKUMBANG	:	Lah talambek angku mananti, sarago ambo baiyo jo batido antaro jo baliau nan basamo, lah dapek izin dek nan tuo, munfakaik jo nan barampia, apo lah buah jo bari dek balaiau nan barampia Di ateh angin nan barasa, hujan nan bapuhun, kato nan ba pangka Apo pulolah nan manjadi pangka kato dek angku cako Batiuk angin di garulak, basabuang ombak dengan topan, mamacah riak di kamudi. Babunyi badia tigo latuih, asok nan bak awan putiah mancimaik masuak muaronyo. Kato sabuah manjadi sambah, samantaro duduak bahadapan, ado ba niniak dengan mamak,  sarato imam jo katik, sarato alek nan hadirko, hubungan silaturahim , nikmaik syukur kapado Allah. Sutan sarif abdul razak, anak rajo dipalembang, duduk basanda ateh kurisi, di tutuik kulambu suto jarang, anak rajo sutan razak, sambahan rakyaik tigo jangko Sabalah hati niniak jo mamak, sarato iman dengan katik, sarato alek nan hadirko, jikoknyo juadah nan katangah, kok kurang tasusun nan bak siriah, kurang ririk nan bak pinang,maaf dimintak banyak- banyak Dinan sakarang kini nangko, kok kilek camin lah kamuko. Kilek baliuang lah kakaki, gabak di hulu tando kahujan, cewang dilangik tando kapaneh, lah hasia janang manatiang, nasi talatak mintak di makan, aia talatak mintak diminum, sampai batambuah lah handaknyo, kan iko nan manjadi bana dek angku?
KARI MUDO	:	Sabananyo angku
RAJO SIKUMBANG	:	Sapanjang bana nan katangah dek angku kok di danga lah baiak bunyi, kok di pandang lah rancak rupo, lah jalan pasa nan batampuah, baa dinan sakarang iko kini, dek janjang alah batingkek, nan bandua lah batapiak, hamparan lah bakaduduai, kok sahinggo iko sajo baa nyo angku?
KARI MUDO	:	Sapanjang bana nan katangah dek angku, bana pulo malah kironyo, apokan sabab dek baitu, nan bak pitua angku juo. Bacincin akiak malah baru, anak rajo sutan basa, bayang malintek ka lawitan, buatan anak bidadari, takarang dengan ameh mutu, itulah cincin nan usali, jaranglah rajo nan mamakai, sampaikasiak indogiri, lalu katimur kasulatan. Kalau baitu kandak angku, bana sakali kami danga, suko manyimak paratian, adaik limbago salamoko, baso jo basi kito pakai, kok talatak nambek dimakan, taratur nambek di minum, dek janjang alah batingkek, kok bandua alah batapiak, indak bana minum jo makan, kok sahinggo iko sajo baanyo angku? Kan iko nan manjadi bana dek angku?
RAJO SIKUMBANG	:	Sabananyo angku
KARI MUDO	:	Mandanga kato angku tadi, bana pulo malah kironyo, dinan sakarang iko kini, Sutan ameh nak balayia Sutan kaua nak ka judah Utang ameh nak babayia Utang kaua nak basudah Iyo sagalo juadah nan katangah mintak ditarimo suko angku
RAJO SIKUMBANG	:	Sapanjang bana nan katangah dek angku cako Lain guru lain pituah, lain padang lain balalang Aratinyo bana kini tu Luruih lah jalan ka pasa matua Ka kida ka pasa lawang Dari mudiak padang galanggang Ibo hatinyo urang didapua Tasirok darah tukang janang Mandanga baso dek bapanjangkan Handaknyo sado juadah nan katangah mintak di parenai dek baliau nan basamo, kok kandak balaku pintak babari, Kan iko nan manjadi bana dek angku?
KARI MUDO	:	Sabananyo angku
RAJO SIKUMBANG	:	Baa tu nyo lai kini, kok kandak balaku pintak babari, bamulo di angku sipangka, manuruik kami sialek angku KARI MUDO Alah kasanang hati angku?
KARI MUDO	:	Dek kandak lah babari , kok pintak bapalakukan Sanang rasonyo dalam hati, sajuak dalam paratian Samo jo bismillah sajo kito mulai angku...