BAMACAM
PANYIMPANAN KATO
I
Nan sapanjang kato Datuak (Sutan).... ,itulah kato nan sabananyo,nan bak
ibaraik urang mandaki,gunuang tinggi ka didaki,jalan nan rombo nan ka
dituruik,hanyo sekarang iko kini,malakik jauah ka dijalang,manjalang dakek ka
disambah,kato dilatak dalam barih,bana disimpan dilimbago,mananti Datuak
(Sutan) sakutiko.
II
Nan sapanjang kato Datuak (Sutan) tadi,nan bak ibaraik kato bida,bak umpamo
kapa balayia,balayie dilauik lapeh,gadang dialam nan sajati,di tanah
Mdinangkabau,di pandang ilia jo mudiak,diliek kiri jo kanan,patuik rundiang
dilatakkan,samantaro kami baiyo,sifat mananti malah Datuak(Sutan)...
III
Sapanjang kato Datuak (Sutan),iyolah kato sabananyo..umpamo urang
manyumpik,dicari katiko baiek,dipandang galah salapan,lalu bajalan inyo
sakali,etan kapadang ribu-ribu,Satibo inyo disinan,dipandang hilie jo
mudiak,diliek kiri jo kanan,tampak rimbo nan satumpak,jalehlah kayu nan
sabatang,dirintiak sampai kasinan,mamandang tadah kaateh,tampaklah anak buruang
nuri,sadang malapeh lapeh payah.
Diambiak sumpitan gadang,sarato
damak nan baipuah,lalu disumpik nan sakali,nan bak kapeh panuahlah damak,satibo
damak diateh,bagaluik jo bungo kambang,babenda jo buah ranun,balunta lunta jo
kabuik,babega bega jo awan.
Nan bak sapatah kato
adat,bak patitiah cupak jo gantang,batanak sagantang matah,nuri batambah jinak
juo,sapanjang pinta jo pinto dari ambo,diwalakkan kalam sakutiko,sifat mananti
malah Datuak (Sutan)..
IV
Dek gunuang tapatan kabuik,disungai jalo bamain,kapadang marantang
tali,karimbo bakarek kayu,tabiang ditungkek dengan janji,rimbo dialah jo
mufakat,tagak dek duduak di nan rapek,limbago basidang dalam adat,supayo rantak
nak saragam,supayo lenggang nak sarayun,suto jo turak nak salasai,nak samo naik
kantakkan,diulua kato jo mufakat,mananti Datuak (Sutan) sakutiko....
V
Sapanjang panitahan Datuak (Sutan) tadi,itulah kato nan sabananyo,bak
ibaraik urang babiduak,rintang dek ombak nan baguluang,mabuak dek riak turun
naiek,raso dek oleang kiri kanan,duduak bamanuang juru mudi,lah dipandang ilie
jo mudiek,lah diliek kiri jo kanan,tampaklah pulau nan sabuah,dikesuik kamudi
kasinan,lah dicubo jo kayuah dapo,lah diajak jo kayuah surang,pulau batambah
hampia juo.Nan sakarang iko kini,malakik haluan ditumbuakkan,manjalang galah
diantakkan,dilatakkan kato jo mufakat,mananti Datuak (Sutan)sakutiko...
VI
Lah sampai dek datuak (Sutan).,nan sapanjang kato Datuak (Sutan),itulah
kato sabananyo,tapi samantangpun baitu,bak ibaraik alang alang,dikarang tonggak
jo bingkai,ditutuik jo karateh outiah,dibari baikua bakipeh kipeh,tarantang
bana jo taraju,dilapeh sadang bak kini.etan ka angin nan baseru,iyo kaawan nan
bajuju,satibo inyo disinan, bapunta punta jo awan babega bega jo kabuik,badan
jauah bunyi lah hampia,di pacik kumpalan banang,jangko tagang dikanduri,taraso
kandua dipatagang,kok putuih sadang bak kini,malakik banang ka kumpalan,manjalang
tangan ka taraju,dilatakkan dalam barieh bana,kato diambiak jo mufakat,mananti
Datuak (Sutan) samantaro....
VII
Nan sapanjang kato datuak (Sutan),.lah ibaraik ambacang jatuah,timpo
batimpo jatuah ka bawah,ambo ditimpo dek bicaro,bicaro nan datang dari Datuak
(Sutan),kato talayang kapado ambo,bunyi lah samo kito danga,rupo lah samo kitp
liek,tapi samantangpun baitu,nan bak santano urang balyia,kapa laju tujuan
sampai,manuju tabiang baharullah.
Sauah jatuah laie baguluang,nakhodo turun ka kamudi.Baa sakarang iko
kini,kilek baliuang lah ka kaki kilejk camin lah ka muko,lah nampak putiak nan
bakuncuang,atau didalam bungo kambang,supayo nak asah jadi buah,kato dilatak
dalam barieh,bana di simpan di limbago,mananti Datuak (Sutan) sakutiko,sakian
sambah pado Datuak (Sutan)...
VIII
nan sapanjang kato Datuak (Sutan),iyolah kato sabananyo,tapi samantangpun
baitu,bak umpamo buruang pipik,babondoang kiri jo kanan,tabang ka padang ribu
ribu,iyo karimbo nan satumpak,sadang mamakan buah rumpuik,Litak lapeh awieh pun
tibo,diminum ambun nan satitiak,sajuak nan bukan alang kapalang,bak paneh di
timpo hujan,tarang bak umpamo bulan panuah,mambayang bayang kamuko,mancayo ka
utak banak,sajuak hati bukan kapalang,sabab lah sudah makan minum,mukasuik bana
dalam hati,manjalang pinang nan sabatang,pulang ka asa mulo jadi.Nan sakarang
iko kini,malakik kaki basitumpu,manjalang sayok ka dikirai,kato dilatak dalam
barih,bana disimpan di limbago,mananti Datuak (Sutan) sakutiko.....
IX
Layang malayang sambah datang,timpo batimpo salam tibo,nan talayang kapado
ambo.Didanga lah baiek bunyi,di pandang lah elok rupo,tapi samantangpun
baitu,ibaraik badan diri ambo,ibaraik rang mangaie tapi sungai,sadang dirintang
aie ilie,sadang di mabuak dek galombang,iyo di alun alun buieh.
Tali tagang piapung hilang,kaie disemba dek gurami,duduak takajuik tukang
panciang,kaie putuih bananglah kusuik,baa sakarang iko kini,samantaro banang
dikumpalan,di walakkan kalam sakutiko,sifat mananti malah Datuak (Sutan)....
