BARAJA PANITAHAN KA MAKAN bisa di donwload

 BARAJA PANITAHAN KA MAKAN

Silahkan donwload disini Baraja Panitahan makan

Sutan Mudo	Angku DT........
Angku DT.....	Manitah-lah
Sutan Mudo	Sambah di puhun kan ka-haribaan angku sakali gawa baribu kali Ampun maaf di mintak banyak2
Sutan Mudo	Angku St..........
ST.Pangeran	Salam di puhun kan ka-haribaan angku sakali gawa baribu kali maaf
Sutan Mudo	Sungguahpun angku surang, Baduo jo batigo tu lah nan taimbau  dek ambo, Nak sarapek jo ganok-nyo lah Baliau nan hadir, nan duduak balingka            Di ateh rumah nangko, Katampek ambo ma-antarkan sambah               Dengan salam Kurang tasilang ka ta atok Atok nak urang si-alahan Kurang pambilang jo pa atok Sambah jo salam di pamuliakan Dimintak reda dengan maaf Kahadapan baliau nan basamo Kasimpanan sambah Ka pado.................(St. Pangeran)
ST.Pangeran	Sampaikan Ngku....
Sutan Mudo	Apolah Jinihnyo sambah nan ka-dilalukan,  Titah nan ka-dipuhunkan ka bakeh angku Harum Baunnyo bungo palo Kuniang ruponyo bungo kambang Barueh bakatak karah Pamenan rajo di ulakan Cucu tuangku bangkahulu Jauh disaru lai tibo Dakek di panggia lai datang Duduak basamo tangah rumah Kandak sipangka maadokan Baitu pitua nan dahulu Cangkia lusin buatan padang Pinggan baukia jo aia ambun Ambun banamo ambun pagi Hidangan mulia nan tahidang Cawan jo mangkuak nan lah tasusun Sadang no suko nikmat hati Lorong ka kami sipangkalan Adok juadah nan katangah Kurang tasusun taratok kan Rila jo maaf di pabanyak Gabak dihulu tando hujan, Cewang dilangik tando kapaneh,  Kilek camin lah kamuko, Kilek baliuang lah kakaki, Apolah kalaluannyo, Lah hasia janang manatiang, Nasi talatak mintak dimakan, Aia tahidang mintak diminum,  Nak mintak di parenai Sagalo baliau nan hadir, Kok kandak mintak balaku Pintak mintak babari Sakian pasambahan bakeh angku st....
ST.Pangeran	Sambah Manyambah angku juo lah,  Nan di anjuang nak nyo tinggi Nan Ambak nak nyo gadang,  Di ateh angin nan basa Di bawah hujan nan bapuhun,  Di siko kato nan ba pangka Apo majadi pangka kato tadi? Harum Baunnyo bungo palo Kuniang ruponyo bungo kambang Barueh bakatak karah Pamenan rajo di ulakan Cucu tuangku bangkahulu Jauh disaru lai tibo Dakek di panggia lai datang Duduak basamo tangah rumah Kandak sipangka maadokan Baitu pitua nan dahulu Cangkia lusin buatan padang Pinggan baukia jo aia ambun Ambun banamo ambun pagi Hidangan mulia nan tahidang Cawan jo mangkuak nan lah tasusun Sadang no suko nikmat hati Lorong ka kami sipangkalan Adok juadah nan katangah Kurang tasusun taratok kan Rila jo maaf di pabanyak Gabak dihulu tando hujan, Cewang dilangik tando kapaneh,  Kilek camin lah kamuko, Kilek baliuang lah kakaki, Apolah kalaluannyo, Lah hasia janang manatiang, Nasi talatak mintak dimakan, Aia tahidang mintak diminum,  Nak mintak di parenai Sagalo baliau nan hadir, Kok kandak mintak balaku Pintak mintak babari Kan Baitu bana Katangah dek angku tadi?
Sutan Mudo	Sabananyo ngku.....
St. Pangeran	Sapanjang bana katangah Di danga lah baiak bunyi, Di pandang lah rancak rupo, Jalan nan pasa nan batampuah Kato nan bana nan basabuik, Kok kandak raso balaku,  Kok pintak raso babari,  Tapi samantang pun baitu Sabalun kandak ka-balaku Sabalun pintak ka-babari Dek niniak jo mamak sarato nantuo Lai hadir duduak balingka di ateh rumah nangko Mako di renjeang kato jo munfakaik, Di tariak kato jo baiyo,  Samantaro ambo baiyo Lai tapakai dek angku sifaik mananti?
Sutan Mudo	Kato sapatah datang dari ambo Ruponyo dek angku lai ka barantang panjang, ba kambang leba Mancari picak nak salayang, mancari bulek nak sagolong Bulek aia ka pambuluah, bulek kato ka munfakaik Limbago kato di pa engongkan Lah ka paengong kan pulo dek angku antaro jo baliau basamo Sarancak nyo,,,, tapakai dek ambo sipaik mananti
ST.Pangeran	Dek kandak lai balaku Dek pintak lai babari Samantaro parantian pasambahan
BA-IYO JO ANGKU DATUAK
St. Pangeran	Angku DT........
Angku DT......	Manitahlah
St.Pangeran	Sambah di puhun kan kaharibaan angku sakali gawa baribu kali Ampun maaf di mintak banyak2 Sungguahpun angku surang, Baduo jo batigo tu lah nan taimbau  dek ambo, Nak sarapek jo ganok-nyo lah Baliau nan hadir, nan duduak balingka            Di ateh rumah nangko, Katampek ambo ma-antarkan sambah               Dengan salam Kurang tasilang ka ta atok Atok nak urang si-alahan Kurang pambilang jo pa atok Sambah jo salam di pamuliakan Dimintak reda dengan maaf Kahadapan baliau nan basamo Kasimpanan sambah Ka pado angku DT...................
Angku DT.........	Manitahlah.........
St.Pangeran	Bukan To Ambo Sambah manyambah antaro jo angku Malahan ka pai tampek batanyo, ka pulang bakeh babarito Ma agak-i  bana nan katangah dek angku sutan mudo tadi Nan tatabua ka tangah rapek, taserak bakeh nan rami, Tumbuah tapeknyo pado ambo Baa dek ambo, datang kato alun bajawek, datang gayuang alun basambuik, Nak manuruik sacarao adaik, bakato ba-iyo bajalan ba-muah, antaro jo baliau basamo, sipaik di mintak pado angku..........
Angku DT........	Sambah Manyambah angku juo lah,  Nan di anjuang nak nyo tinggi Nan imbak nak nyo gadang,  Di ateh angin nan basa Di bawah hujan nan bapuhun,  Di siko kato nan ba pangka Apo majadi pangka kato tadi? Ma agak-i  bana nan katangah dek angku sutan mudo tadi Nan tatabua ka tangah rapek, taserak bakeh nan rami, Tumbuah tapeknyo pado ambo Baa dek ambo, datang kato alun bajawek, datang gayuang alun basambuik, Nak manuruik sacaro adaik, bakato ba-iyo bajalan ba-muah, antaro jo baliau basamo, sipaik di mintak pado ambo.......... Kan baitu bana katangah dek angku tadi
St.Pangeran	Sabananyo NGKU......
Angku DT........	Sapanjang bana katangah Di danga lah baiak bunyi, Di pandang lah rancak rupo, Jalan nan pasa nan batampuah Kato nan bana nan basabuik,   Baa tu nyo lai kini.... Di ateh puntiang nan ma antak, di bawah ujuang nan manikam Dek angku juo lah nan manarimo panitahan sutan mudo tadi Ba kumbalikan juo dek angku, baa pambarian angku, lah sabari jo baliau basamo
ST. Pangeran	Dek ambo juo lah nan manarimo panitahan sutan mudo tadi Ba kumbalikan juo dek ambo, baa pambarian ambo, lah sabari jo baliau basamo Kan baitu bana katangah dek angku?
Angku DT.....	Sabananyo...........
St.Pangeran	Sapanjang bana katangah Di danga lah baiak bunyi, Di pandang lah rancak rupo, Jalan nan pasa nan batampuah Kato nan bana nan basabuik Kok barek lai ta pikua, kok ringan lai tajinjiang manuruik sapanjang adat Sabuah juo bana bajapuik ka haribaan angku Kok ta barikan ambo dek nan iyo , io lah ka sanang hati baliau basamo Kok ta barikan dek ambo dek nan bukan Iko sipaik juo bajapuik ka pado angku
Angku DT.....	Kok ta barikan angku dek nan iyo , io lah ka sanang hati baliau basamo Kok ta barikan  di nan bukan,       Sipaik ba japuik bakeh ambo Kan itu manjadi bana dek angku?
St. Pangeran	Sabanano ngku
Angku DT	Sapanjang bana katangah Di danga lah baiak bunyi, Di pandang lah rancak rupo, Jalan nan pasa nan batampuah Kato nan bana nan basabuik Baa tu nyo lai kini..... dek karano baliau lai rapek jo ganok duduak balingka di ateh rumah nangko Kok ta cicia ba piliahi, koq taserak ba kampuangkan, kok hanyuik ba pinteh, luluih ba salam, nan di tapi bakatangahkan, koq di tangah di paliharo dek baliau basamo Alah kasanang hati angku,kumbalikan lah
St. Pangeran	Lah ba siangkan dek angku bak hari, lah batangkan pulo nan bak bulan, sanang rasonyo dalam hati, sajuak di dalam paratian Dek paneh ba asa, hujan ba puhun, ambo kumbalikan ka asanyo ngku....
Angku DT....	Sarancaknyo
St. Pangeran	Parantian pasambahan
Angku DT...	Parantian
MANGUMBALIKAN PANITAHAN
St.Pangeran	Angku Sutan MUDO
Sutan mudo	Sampaikan ngku.....
St. Pangeran	Lah talambek angku mananti, sarago ambo ba-iyo jo batido, antaro jo baliau nan basamo, lah dapek bana nan sa ukua, kato nan sasuai pambarian baliau tantang itu, ambo juo manyampaikan pado angku...... Satantang kandak angku angku tadi, kok kandak raso balaku, kok pintak raso babari, tapi samantang pun baitu Dek janjang alah ba tingkek, dek bandua alah batapiak Kok indak bana mimum jo makan, kok sahinggo iko sajo baa ngku?
Sutan mudo	kok kandak raso balaku, kok pintak raso babari, tapi samantang pun baitu Dek janjang alah ba tingkek, dek bandua alah batapiak Kok indak bana mimum jo makan, kok sahinggo iko sajo baa ngku? Kan ba itu bana katangah dek angku?
St.Pangeran	Sabananyo ngku....
Sutan mudo	Sapanjang bana katangah Di danga lah baiak bunyi, Di pandang lah rancak rupo, Jalan nan pasa nan batampuah Kato nan bana nan basabuik Baa tu nyo lai kini..... SUTAN AMEH NAK BALAYIA SUTAN KAUA NAK KA JUDAH UTANG AMEH NAK BA_ BAYIA UTANG KAUA NAK BASUDAH Iyo sagalo juadah nan katangah mintak di tarimo suko ngku....
St. Pangeran	SUTAN AMEH NAK BALAYIA SUTAN KAUA NAK KA JUDAH UTANG AMEH NAK BA_ BAYIA UTANG KAUA NAK BASUDAH Iyo sagalo juadah nan katangah mintak di tarimo suko Kan baitu bana katangah dek angku?
Sutan Mudo	Sabananyo ngku
St.Pangeran	Sapanjang bana katangah Di danga lah baiak bunyi, Di pandang lah rancak rupo, Jalan nan pasa nan batampuah Kato nan bana nan basabuik Baa tu nyo lai kini..... Kandak ba-laku , pintak ba-bari KA RIMBO PILINAN AKA KA LABUAH PILINAN KAWEK BA-MULO ANGKU SIPANGKA MANURUIK KAMI SI-ALEK
Sutan Mudo	Kandak ba-laku , pintak ba-bari KA RIMBO PILINAN AKA KA LABUAH PILINAN KAWEK BA-MULO ANGKU SIPANGKA MANURUIK KAMI SI-ALEK Kan baitu bana katangh dek angku tadi?
St.Pangeran	Sabananyo ngku
Sutan mudo	Sapanjang bana katangah Di danga lah baiak bunyi, Di pandang lah rancak rupo, Jalan nan pasa nan batampuah Kato nan bana nan basabuik Baa tu nyo lai kini..... Dek kandak balaku , pintak ba-bari Samo jo BISMILLAH kito mulai nku....